ستاتوسات فيسبوك

كتبت سماح سلايمة | المشتركة المتعسرة؛ بهاي الوتيرة كل صوت "قرفان" راح يقع بحضن ميرتس!

المشتركة المتعسرة:


اولا : رحم الله امرئ عرف قدر نفسه .. الجمهور فاهم اكثر من القيادة انه الاسلاميه والتغيير والتجمع يا دوب يادوب عالحفة.. وإذا ما في مشتركة كمان الجبهه بتوقع بالهاوية، وستتحمل مسؤوليه الخسارة الفادحة المتوقعه.

 

ثانياً: التجمع اللي انسحب من التفويض ضر بنفسه كحزب مهم وشريك أساسي ، ولو يحكو من هون لبكرا انه المشتركة مشروع وطني قومي وحلم التجمع من سنة الثلجة ، مش مقنع طرحكم ابداً، آسفة

ثالثا: الجبهه والإسلامية من وين زواج المسيار هاد طلع؟ بعدها لافتات الأخضر والبرتقالي معبيه الدنيا.استنو شوي علينا.

 

رابعاً: لو مبادرة ادخال المستقلين بالمقاعد 11-15 اجت بدري ومن حدا غير الطيبي كان ممكن تُقبل بثقة اكبر بالشارع . للاسف قراءة الشارع اجت متاخر ومن حزب مُلام ولم يُشفع له بعد الخطأ السابق مثل البوليس بالأفلام العربيه لا يسمن ولا يغني من جوع، وبس بيعصبن .

 

خامساً: لو في وقت وموارد كان انبنى حزب بديل من غير هاي اللغاويص. وكل المبادرات الحاليّه للاسف ضعيفه وبرضه غير مقنعه ويقف خلفها نشطاء يحلمون بدخول البرلمان من زمان. كل الاحترام عالمثابره والإصرار.. بس مش وقته .


سادساً: كل حزب يفحص السوسه اللي بتنخر بعظمة من جوا ، اكم صوت قوي ومهيمن وغير عقلاني ولا يمثل كل كوادر الحزب ونشطاؤه ومفكر حاله بده ينقذ الحزب في معركة الكرامة ، او الانهيار التام. اهدوا وصلو عالنبي. وانزلوا عن الشجرة وبيكفي مناكفات فيسبوكيه، بكرا ازا اتفقو بالمشتركة كيف بدكو تديرو حمله ناجحه ..دورتونا دور.


سابعاً: بهاي الوتيرة ميرتس رح تقوى بالشارع العربي ، وكل صوت قرفان من المشتركة ومش مقتنع بالمقاطعة رح يقع بحضنهم عالبارد المستريح.
ثامنًا: رح تتعصبنو بعرف ، بس والله لو لجنة الوفاق هاي (رضينا بالهم وما رضي بينا) فيها اكم امراه جدعة من هالمجتمع كان يمكن وضعنا احسن. 


تاسعاً: سيذكر التاريخ هذه الايام العصيبه ، وسيكتب في التاريخ ان الفلسطينين لم يتفقوا على قائمة تمثلهم بالعالم ، في ظل اصعب وأشرس حكومات اسرائيل المدعومة من اميركا.


ويمكن حفيدتي تسألني وين العرب كانو يا تيته لما باعت الأقصى، وهدو بيتنا وقتلونا. 


رح اجاوبها كانو يتطاوشو يا ستي عالكرسي رقم 12.

 



bar_chart_4_bars مقالات متعلقة

كتب طلب الصانع | منصور عباس يطرح برنامج واضح...

2021/06/14 09:33

كتبت سناء لهب | عندي سؤال صرله فترة بتردد...

2021/06/04 07:56

كتبت سناء لهب | لا افهم من يهاجم منصور عباس...

2021/04/02 11:04

كتب سليم سلامة | على قدر حلمك تتسع الأرض (م....

2021/03/21 20:43

كتب سليم سلامة | ارفَعوا أيديكم عن هذا...

2021/03/05 12:59